မြန်မာနေရှင်နယ်လိဂ်နှင့် Myanmar Care တို့၏ စပွန်ဆာ စာချုပ်ချုပ်ဆို

မြန်မာနေရှင်နယ်လိဂ်နှင့် Myanmar Care (ကရုဏာရှေးရှု မြန်မာမှု) တို့၏  စပွန်ဆာ စာချုပ် ချုပ်ဆိုပွဲ အခမ်းအနားကို မေလ ၂၂ ရက်၊ ညနေပိုင်းက  ရန်ကုန်မြို့၊ နိုဗိုတယ်ရန်ကုန်မက်စ်ဟိုတယ်၌ ကျင်းပပြုလုပ်ခဲ့ကြောင်း သိရသည်။ 

မြန်မာနေရှင်နယ်လိဂ်မှ အကောင်အထည်ဖော် ဆောင်ရွက်နေသည့် လူငယ်ဖွံ့ဖြိုးရေး စီမံကိန်းများနှင့် လူငယ်ဘောလုံးပွဲတော်များအတွက် Myanmar Care မှ တစ်ဖက်တစ်လမ်းမှ ပံ့ပိုးပေးအပ်သည့် စပွန်ဆာ စာချုပ် ချုပ်ဆိုပွဲ အခမ်းအနားသို့  မြန်မာနိုင်ငံဘောလုံးအဖွဲ့ချုပ်နှင့် မြန်မာနေရှင်နယ်လိဂ်ကော်မတီဒုတိယဥက္ကဌ ဒေါက်တာစိုင်းဆမ်ထွန်း၊ မြန်မာနိုင်ငံဘောလုံးအဖွဲ့ချုပ် အမှုဆောင်အဖွဲ့ဝင် ဦးမိုးဆန်းအောင်၊ မြန်မာနိုင်ငံဘောလုံးအဖွဲ့ချုပ် အလုပ်အမှုဆောင်အဖွဲ့ဝင် ဦးမင်းလှိုင်၊  မြန်မာနေရှင်နယ်လိဂ် အမှုဆောင်အရာရှိချုပ် ဦးစိုးမိုးကျော်၊ မြန်မာနေရှင်နယ်လိဂ် စီမံခန့်ခွဲရေး အရာရှိချုပ် ဦးဆူးအောင်၊ မြန်မာဘရူဝါရီလီမိတက်မှ Deputy Managing Director Mr. Kazufumi Nagashima နှင့် တာဝန်ရှိသူများ၊ မြန်မာနိုင်ငံဘောလုံးအဖွဲ့ချုပ်နှင့် မြန်မာနေရှင်နယ်လိဂ်မှ တာဝန်ရှိသူများ၊ ဖိတ်ကြားထားသည့် အထူးဧည့်သည်တော်များ၊ စာနယ်ဇင်း မီဒီယာများ စုံလင်စွာ တက်ရောက်ခဲ့သည်။

စပွန်ဆာလက်မှတ်ရေးထိုးခြင်း အခမ်းအနားကို ပြုလုပ်ခဲ့ရာ  မြန်မာနိုင်ငံဘောလုံးအဖွဲ့ချုပ်နှင့် မြန်မာနေရှင်နယ်လိဂ်ကော်မတီဒုတိယဥက္ကဌ ဒေါက်တာစိုင်းဆမ်ထွန်း၊ မြန်မာဘရူဝါရီလီမိတက်မှ Deputy Managing Director မစ္စတာကာဇုဖူမီ နာဂါရှီမား တို့မှ စပွန်ဆာ စာချုပ်လက်မှတ်ရေးထိုးခဲ့ပြီး အမှတ်တရပစ္စည်းလက်ဆောင်များ အပြန်အလှန် ပေးအပ်ခဲ့သည်။
ထို့နောက် သတင်းစာရှင်းလင်းပွဲ အခမ်းအနားအား ဆက်လက်ပြုလုပ်ခဲ့ရာ တက်ရောက်လာသည့် မီဒီယာများ၏ မေးမြန်းချက်များအား မြန်မာနိုင်ငံဘောလုံးအဖွဲ့ချုပ်နှင့် မြန်မာနေရှင်နယ်လိဂ်ကော်မတီဒုတိယဥက္ကဌ ဒေါက်တာစိုင်းဆမ်ထွန်း၊ မြန်မာနေရှင်နယ်လိဂ် အမှုဆောင်အရာရှိချုပ် ဦးစိုးမိုးကျော်၊  မြန်မာဘရူဝါရီလီမိတက်မှ Deputy Managing Director မစ္စတာကာဇုဖုမိနာဂါရှီးမားနှင့်  မြန်မာဘရူဝါရီလီမိတက်မှ Corporate Communications Manager ဦးမိုးဇော် တို့မှ ပြန်လည် ဖြေကြားပေးခဲ့ပြီးနောက်  စာချုပ်ချုပ်ဆိုပွဲ အခမ်းအနားကို ရုပ်သိမ်းခဲ့သည်။

ယခုနှစ်တွင်လည်း တိုင်းနှင့်ပြည်နယ် ၁၀ ခု၌ ဆက်လက်ကျင်းပပြုလုပ်သွားမည်ဖြစ်ရာ Myanmar Care မှ ကလေးငယ်များအတွက် ဘောလုံးအကျီ င်္၊ ကျောပိုးအိတ်၊ ထီး၊ တိုင်းနှင့် ပြည်နယ်တစ်ခုစီအတွက် ဘောလုံးများနှင့် Track Suit များ စသည်တို့ကို  ဆက်လက် ပံ့ပိုးပေးသွားမည်ဖြစ်ကြောင်း မြန်မာနိုင်ငံဘောလုံးအဖွဲ့ချုပ်မှ သိရသည်။